分享今次為咗慶祝老婆生日，決定偷偷地比個快閃之旅。
（PS：特別多謝外母幫助睇住小魔怪）
今次揀咗個4日3夜清邁快閃之旅，諗住行下夜市食野，做Spa，最重要係睇中左一間山上嘅酒店，感覺好舒服，順便吸引下靈氣，洗淨心靈。
今次坐咗Air Asia呢間廉航，平得黎仲可以夾到時間，一落機我地就衝左去夜市—Chiang Mai Night Bazaar。呢度有好多當地既特色美食，例如：燒海鮮、泰式串燒、泰式抄河，當然唔少得解熱嘅啤酒、沙冰同埋甜品啦！喺呢度食野，仲會有現場嘅歌唱表演，一邊食、一邊飲酒、一邊欣賞，一生一樂也。醫飽完個肚，當然就係行下個夜市啦！我地發現同我哋去曼谷行嘅夜市完全唔同，呢度嘅夜市好多Hand made製品，好啱我地呢啲偽文青。
今次酒店搵咗間近返古城區嘅酒店，Away Chiang Mai Thapae Resort - A Vegan Retreat。呢間酒店非常方便，如果係行街同行夜市，只需要步行大約10分鐘左右，落街已經有好多嘢食。除此之外，亦都好近我哋今次另一個目標，做Spa，附近有好多大大少少嘅按摩店，價錢非常親民，質素亦比曼谷的有過之已無不及。
Away Chiang Mai Thapae Resort - A Vegan Retreat
Fah Lanna Spa & Massage
最後一晚我哋轉咗第2間山上酒店—PANVIMAN CHIANG MAI SPA RESORT，老實講呢間酒店，的確好遠好唔方便，不過試過之後，你可能會覺得唔夠，希望再住多1—2晚，因為呢度嘅環境真係好舒服，由於山上嘅關係，空氣特別好，一覺醒來仲可以望到雲海，喺呢個咁寧靜咁舒適嘅環境之下，感受到大自然嘅靈氣，可洗淨心靈。
酒店亦都有瑜伽班及烹飪班，同埋亦有好多打卡點，希望下次可以再試下呢類形洗淨心靈特色酒店。
總結：清邁係一個好舒服嘅地方，行街、做Spa、食嘢都會比曼谷便宜，亦唔似得曼谷咁商業化，不過亦因為咁，好多時都係行室外為主，接近40度嘅天氣真係唔係咁易頂，大家都需要有定心理準備啦！
撰文︰
ROY LAM 專業旅運屯門分行
直線電話: 3420 6864
電郵: [email protected]
