東京富士山溫泉煙花之旅

2021-01-15
分享

今次帶住媽媽去旅行,計劃行程上要盡量舒服休閒為主。首先航班上選擇國泰航空,大約早上十點半起飛,回程航班就選擇大約五點鐘左右起飛,返到香港大約九點半左右。
第一天雖然到達東京大約三點半,但過埋關坐車返到酒店已經六點半,所以我事前已經決定在酒店附近食晚餐,俾媽媽返酒店休息。今日晚餐我地去長壽庵食蒿麥麵,其實選擇呢間餐廳最主要原因係以前我地去過指宿間長壽庵餐廳,媽媽好鐘意佢地D蕎麥麵,所以想睇睇係唔係同一間鋪,最後發現雖然唔相同,但都幾好食。
長壽庵
食完晚餐就返酒店Check in,今次酒店我選擇住MIMARU TOKYO HATCHOBORI Apartment,因為空間比較大,如果媽媽行街覺得攰可以帶佢返酒店休息。
MIMARU TOKYO HATCHOBORI Apartment

第二天早上去築地鮨國食午餐,然後去澀谷購物,晚上去澀谷釣船茶屋食飯再返酒店。

築地鮨國釣船茶屋

第三天我安排去富士山浸溫泉睇煙花,每次帶媽媽去日本旅行我都一定帶佢去浸溫泉,所以今次我都一樣安排了佢最喜歡活動,其實未到之前都有D擔心天氣太熱浸溫泉會好辛苦,可能當日有雨富士山天氣都有D凍。到達河口湖車站我就去隔離河口湖旅遊服務處請佢地代為聯絡酒店安排車接送。今次住呢間溫泉旅館叫夢殿,房內有私人風呂,媽媽都很喜歡。
夢殿

晚上旅館安排獨立房間俾我地享用晚餐,晚餐好豐富,不過上菜好慢,未上生果我地就離開餐廳去睇煙花。其實如果唔係咁啱有煙花睇,慢慢享受晚餐都幾好。離開旅館聽到煙花已經開始發放,好彩旅館附近已經可以睇到煙花,我地行去一處空地欣賞。睇完煙花返去房間準備浸溫泉,由於晚餐時未上生果就走,所以餐廳將生果放在房內方便我地睇完煙花之後可以食生果。
夢殿 Dinner
第四天早上享用豐富早餐後,收拾行李後離開旅館,向箱根出發。
 夢殿 早餐
今次箱根住仙鄉樓,旅館相對比較舊,經過走廊有一陣異味,可能係山區比較潮濕,但入房間後又冇味。房間乾淨舒適,一樣係房內有私人風呂。晚餐係送入房間享用,亦都非常美味。
仙鄉樓  

仙鄉樓仙鄉樓
 
第五天食完豐富早餐我地就準備離開溫泉旅館,旅館附近有巴士站,本來我地諗住坐巴士去桃源台港坐箱根海賊船遊蘆之湖,但係我地坐錯車唯有去元箱根港,好彩都一樣坐到箱根海賊船,今次我地坐女王蘆之湖號去桃源台港,船程約25分鐘。可惜今次空中纜車因為火山問題暫停開放,我地唯有去些巴士到早雲山坐箱根登山纜車到強羅站,坐完登山纜車再坐登山電車到箱根湯本站坐浪漫特快號到新宿。特快車票係我一個月前上網訂,佢特色係車頭有全景式大敞窗,可以睇到沿途風景。到達新宿後我地坐車返酒店,我地先去超市買牛肉蔬果,然後再去便利店買雪糕返酒店食。由於我地住返之前間Apartment,大件行李酒店幫我地保存,所以我地攞返之前寄存行李就返房去煮晚餐。

箱根海賊船  

箱根登山纜車
第六天我只係安排買手信及去蟹道樂食蟹宴就返酒店收拾行李。第七天我地攞住行李去車站寄存,中午食完午餐就出機場坐飛機返香港。
 

CATHY HUNG
專業旅運中環分行
直線電話: 3700 2827