分享原本只是一個普通東京美食之旅，但同伴話有冇得加點特別行程？只好辛苦點上網找資料，又好彩咁啱12月東京近郊有夜祭，另外12月逢星期六東京台場都有花火大會，加上趕及聖誕燈飾令今次東京之旅變得不普通。
12月2日晚上坐零晨機飛去東京成田機場，到埗後立刻坐車去池袋酒店放低行李，再到池袋西武線車站買車票去西武秩父站，當天會有一些特急快車直達西武秩父站，可惜當天我們只買到下午二時列車班次，大約一個半小時到達西武秩父站。
一出車站已經有些美食攤擋及當地居民表演，我們沿著人海行，沿途見到放住一些屋台，當地人準備晚上巡行，晚上7點半，巡行開始，沿途兩旁已經企滿人潮，我們觀看了一個半小時已經好攰，都係返酒店休息。
第二天中午起床後，收拾行李就搬去近銀座附近酒店放底行李，立刻行去築地外市場，每次去東京我都一定會去鮨國吃海膽丼，有時人多要排好耐隊，我們只要先攞籌，佢哋會叫你幾點再返去，到時等一陣就有位，我覺得都幾好，每次先攞籌再行吓附近攤擋夠鐘再返去，起碼唔使嘥時間喺佢哋門口等又冇得走開。
食完海膽丼就坐車去豐洲巿場，但我覺得冇乜嘢特別，所以唔會再來，除非嚟食壽司大，但要肯排幾小時隊才可以，我之前在築地市場試過排咗三小時以上才食到。
去完豐洲市場就坐車去東京丸之內車站，行咗一陣見到仙台牛舌專門店（喜助），我們試咗一個厚切牛舌及一個薄切牛舌，感覺厚切好味D。食完晚飯就坐車返酒店。
.jpg)
第三天，坐車去上野，出發前睇咗周奕偉嘅周遊東京介紹有個甜點outlet ，就走去試吓，買完後就行去對面上野公園坐底享用。一邊享受美食一邊睇吓風景，估唔到12月仲睇到少量銀杏樹。
中午就去咗上野火車站附近一間叙苑燒肉店食午市套餐，午餐後當然要行一番街買手信，買完手信就坐車返酒店休息一下。晚上再行去梅丘美登利食壽司，建議早點去攞籌，之後去行街，行完街再返去，我們等咗大約兩個小時，輪到我們嘅時候佢已經話last order， 我叫咗個壽司set就算，講真排隊排咗兩個鐘，食嘢唔使半個鐘，好快食完就走，慢慢行返酒店。
第四天安排咗去木更津outlet ，點知上錯車，去咗木更津金田巴士站，好彩嗰到有車去木更津outlet，不過平日班次比較少，等咗大約45分鐘先有車，到咗outlet已經差不多中午，所以決定先食咗飯再血拼。我每次嚟都一定去食金子半之助天婦羅丼，食飽飯就去綜合服務中心攞2片休足時間及優惠卷。記得save 底QR code或網站，因為到時要出示才可換領。
記得預留時間退稅及儲亞洲萬里通里數，因為我試過排咗好耐隊攪退款，差點趕唔切坐車返去。另外退稅時佢地要你出示護照，單據及所有購買物品。坐車返酒店放底戰利品，就行去覓食，因為太肚餓，所以經過一間餐廳見不用排隊就入咗去試，食完覺得不過不失，連餐廳名都已經唔記得，算啦呢間餐廳唔喺我杯茶，應該唔會再返去食。
第五天中午坐車去新宿蟹道樂食蟹宴，其實銀座都有分店，但唔知點解每次我只喺會嚟呢間分店。食完午飯就坐車去原宿，沿著竹下通行慢慢行去渋谷，晚上睇青之洞窟聖誕燈飾，跟著去食吉列牛扒-牛かつ もと村，又係排隊排咗好耐，入去已經last order，食完出嚟餐廳已經差不多關門。
第六天坐車去試周遊東京介紹嘅龍蝦麵，又喺要排隊，講真D食物都算好食，不過如果要排咁耐隊就要諗清楚，我覺得未去到非吃不可，試過影返張相就得。食完嘢返酒店休息一下。
晚上坐車去台場睇煙花，原本因為太攰瞓覺瞓到唔願起身，但諗吓明天都返香港啦，同埋咁啱撞到佢有煙花大會就去睇吓，好彩有去睇，因為比我想像中好，去到台場跟著人行就得，同埋人唔太多，感覺幾舒服，起碼唔會人迫人。睇完煙花在台場隨便食咗碗拉麵就返酒店執行李。
第七天check out 酒店寄存行李就行去築地外市場掃街食一些小食，雖然好多舖頭都休息，但喺又俾我撞到有伊勢龍蝦，平時唔見，我諗可能只有星期日才開擋，食完午餐就返酒店坐車出機場。
CATHY HUNG
專業旅運中環分行
直線電話: 3700 2827
