睇動物,梗係去非洲睇!
2020-05-27
分享
平時去旅行都會去動物園,但係來來去去都差唔多,心諗可唔可以去啲好似國家地理雜誌咁地方,睇野生動物最真實一面但係又唔想淨係去睇動物無其他野睇咁單調, 諗黎諗去究竟有啲乜地方可以滿足到, 咦南非都得喎, 心動不如行動嗱嗱臨出發!
Day 1
由於我去的時候香港去開普敦沒有直飛,唯有飛去約翰內斯堡再轉機過去,坐左16個鐘頭機終於到達開普敦,一落機就梗係去整張WiFi卡先啦,未黎之前以為非洲好落後,原來係我太孤陋寡聞。攪掂曬啲野就搭的士去酒店,今次揀左住維多利亞阿爾弗雷德碼頭廣場附近嘅Radisson Blu Hotel Waterfront , 間酒店個View好靚可以望住個大西洋又近碼頭廣場區 , 貴小小都值。
酒店外觀
附近碼頭
搭左咁耐飛機都有啲攰今日去一個比較近嘅景點就算, 於是就揀左去桌山。
桌山(英語:Table Mountain,又名上帝餐桌)位於南非西開普省開普敦附近,是一座頂部平坦的沙岩山。
Source: Ashim D'Silva
喺酒店附近已經有個桌山打卡位。
由酒店去桌山20min 車就到達,好快就去到門口,喺桌山吊車站唔使排好耐就上到吊車。而且吊車係360度自轉,無論邊個位置都可以睇哂全部風景。上山沿途可以搵下一隻叫Dassie嘅動物, 非常可愛又唔驚人,成群結隊訓喺石頭上懶洋洋的曬太陽。桌山頂上亦有餐廳同紀念品店。
Dassie
Source: Captureson Photography
山上風景
喺係山上睇埋日落就返酒店休息下先, 求其喺附近商場食啲野就算,聽日跟左個Local Tour 要一早起身今日早啲訓。
Day 2
今朝一早起身跟左個Local Tou去好望角 , 十二門徒峰同睇南非企鵝。
喺酒店食個早餐先, 啲野食都多選擇食完睇怕都唔使食晏晝,但係一路食就有啲海鷗係格離等食攪到每次都要清曬張枱先可以去攞其他野。食飽就去集合點 ,同團全部都係外國人(嚟左咁多日都無見過一個華人,南非應該好小亞洲人黎)聽完行程講解就出發!
第一站先去Maidens Cove 欣賞十二門徒峰
估唔到咁靚,白色嘅沙灘配上藍色的海加埋後面個12個山峰成長明信片咁,山下係一個小城鎮我見有好多外國人喺度渡假好休閒, 可惜喺度時間太短唔喺留番一兩日係到Hea就正。
去完十二門徒峰途經一個鴕鳥養殖場 ,嚟到南非無理由唔同鴕鳥影相下,順便買飼料餵食。
去完養殖場終於黎到世界知名的好望角 Cape of Good Hope
行上好望角岬角,可以睇到非洲最西南點 , 呢到風急浪高,啲船駛過都唔好話唔危險, 怪不得號稱是世界上最危險的航段之一。
Source: Victor Smits
山上有一條路直通燈塔,可以選擇慢慢行下或者搭纜車。
Source: Rebekah Blocker
臨走時候記住去好望角郵局可以寄張有燈塔的紀念郵戳的明信片返黎。去完好望角之後下一站就去睇瀕臨滅絕嘅南非企鵝。
Source: Mikell Darling
睇完企鵝今日個TOUR 就完結,先返酒店休息下先晏啲再去附近行下搵食。唞左陣又出動過,睇下地圖附近有個跳蚤市場一於去行下,
大慨走左15min 到就到達 ,呢個市場好似女人街咁都係賣啲特色手信,手工藝品,衫褲鞋襪之類,佢地啲野都好COLORFUL ,最特別慨手信都係彩繪鴕鳥蛋 , 幾靚價錢又唔貴。
行左過零鐘開始肚餓去搵嘢食,住呢個碼頭區主要都係食西餐為主啲炸魚,炸薯條,PIZZA,海鮮併盤之類,嚟之前以為佢地啲南非鮑魚咁出名應該周圍都有得食,點知到走個日都未見過 ,可能我唔識搵有啲失望。如果諗住嚟食到平鮑魚/龍蝦嘅朋友就唔好抱太大希望,食飽飯就返酒店休息。
Day 3
今日一早出發出海去睇海豹,海豹島上的海豹叫作Arctoce Phaluspusillus,由Hout Bay碼頭坐船出發,大約十幾分鐘到,海豹會喺礁石上曬太陽同休息。
Source: Thomas Butler
去完海豹島下一站就返去市區去彩虹小鎮Bo-kaap行下順便醫肚!
Source: Madiba de African Inspiration
呢個小鎮好靚好似去左卡通世界咁,求其影都好似明信片,打卡一流。行左陣影埋相就去開普敦市中心行下,市中心就商業好多本地人為主 , 因為南非以前比英國統治過所以市區有D建築物都仲有保留住殖民地特色。
Cape Town City Hall
Source: Freepik
行到攰就搵嘢食,係市中心呢邊選擇比較多有中日韓泰越呢啲啱返香港人口味慨野,口味就當然香港好食啲不過止下痕都好滿足。食飽就去超市掃下貨,順便買埋好出名慨國寶茶 , 南非啲零食一般都比較貴反而紅酒就平,不過聽去酒莊參觀去到先買。
國寶茶
Day 4
今日行程去參觀葡萄園 ,會參觀兩個酒莊,全程試左好多款酒,好在今朝食得飽,唔係都幾傷胃。
走時候都有買幾支酒離開,有啲係葡萄園先有得賣。去完酒莊返酒店抖下,見無咩特別行程就去附近碼頭行下,去到見到有得坐海盜船出海睇日落,價錢又唔係好貴,好出發!架船會先喺開普敦外海兜個圈望桌山同埋周邊的景點,最後就會喺海中心度睇埋日落先回航。船上啲船員會扮曬海盜咁一路航行一路講解都幾得意。
遊完船河食埋黎就酒店訓覺執行李,準備聽日坐飛機去睇動物。
Day 5
今日最後半日係開普敦見有時間就坐船去羅本島行下。
Source: Grant Durr
呢個島係一個監獄島, 曼德拉亦喺呢到囚禁過,可以了解到曼德拉事跡,所以羅本島又稱為南非民主的基礎,好值得嚟一轉!
去完監獄島就返酒店攞埋行李到機場搭飛機去我好期待嘅野生動物追蹤之旅,由於搭夜晚機去到機場BOOK間酒店住,第二朝先一早出發。
Day 6
今朝一早就有人嚟酒店接我地去Kruger National Park國家公園到玩3日2夜,成個團8個人,全部都是外國人沿途經過啲小鎮食下LUNCH,大家傾下講下好快5個小時車程就到。一去到門口嘩咁似睇緊侏羅紀公園咁,去到營地安頓好聽埋領隊講解埋行程就出發去追蹤野生動物!
呢到啲營地有分唔同級數,我就簡左中等級數入住。(住呢到久唔久可以望到啲野生動物係窗口經過 , 呢幾我就見過長頸鹿 , 羚羊 ,大象)啲營地外圍有圍欄.鐵絲網擋住,而且唔係獅子豹之類危險動物的棲息地 ,所以好安全。
中等級數營地
攪掂曬就出發,我地先會坐呢種4x4敞篷車去睇動物。
希望可以搵齊非洲BIG 5啦!(BIG 5指獅子、非洲象、非洲水牛、豹和黑犀牛五種非洲動物)
成個旅程大約3-4hr , 今次就見到象, 水牛 , 長頸鹿 , 羚羊 ,班馬,真係好開心成程車都好似去左探險緊 , 終於可以係個大草原到睇到D動物最原始一面
睇埋日落就返去營地。
Source: Peter Scholten
夜晚就同啲團友一齊食飯, 係非洲大草原到望住個一望無際星空同啲團友傾下講下 , 真係好正。
Day 7
起身就去食早餐,嘩一去到個餐廳見到好多細細隻慨馬騮係到陪你食飯 , 好過癮。攪到每次都要食曬D野先可以出過去攞其他。食飽休息左陣就出發今日全日行程去追蹤動物。今次好好彩見到獅子同豹。
中午睇完就去餐廳食午餐,原本係個草原都有好多餐廳選擇,夜晚返到營地食完飯就去夜間追蹤,夜晚反而見到好多小動物。好彩架車高身都咪話唔驚!
Day 8
今朝一早5pm起身去睇日出OMG , 掙扎左好耐先醒到,不過睇完真係值返曬。睇完日出返去執行李同食埋早餐就去機場,8 日 7 夜話咁快就完 仲有好多地方未去到希望遲啲有時間再去補漏。
KELVIN POON
專業旅運荃灣分行
直線電話: 3959 1654